فرح الاهلاوية بأنشاء قناة خاصة بالنادى ورغم ان فى ناس كتير وقفوا قدام طلوع القناة للشمس وخرجت اخيرا بعد سنين طويلة.
ابتدت القناة بماتش تقيل هو ماتش روما بعد كدة قعدت القناة فترة متزعش متشات للاهلى لغاية ما ذاعت بعد كدة الماتشات , ديكور الاستديو التحليلى اجمل ستديو لاى قناة فضائية ,وضمت اعلاميين لامعين زى نصر القفاص والليثى وعبد الحفيظ وعمرو شاهين .
لكن فى اخطاء كتير فى القناة لازم تتقال .
منها الاهداف اللى بتتعاد كل يوم لغاية ما حفظها الناس وكلها اهداف فترة الثمانينيات وخلاص الناس زهقت منها ومفيش اجوان غيرها وكأن الاهلى بتأريخه ماجبش اجوان غير الشوية دول .
فى برضو ان القناة بقالها 6 شهور ولا تذيع غير برنامجين يوميا ومدتهم مجمعين ساعتين ونص ولا شفنا برامج جديدة .
مافيش كليبات واغانى للاهلى تتذاع فى الفترات اللى مفيهاش برامج مع ان اى قناة تانية عندها كليبات للاهلى كتير.
الحياد زيادة عن اللزوم فبنشوف فى مواقف كتيرة مقدمى البرامج بيميلوا للحياد وكأنها قناة عادية مش بتاعة نادى ومواقف كتير مش بنشوف فيها دفاع القناة عن النادى والجماهير ومنها قضية الالتراس اللى للاسف شايف القناة واخدة موقف سلبى ومش بتدافع عن جماهيرها المظلومين.
استضافة ناس دايما بيستهزؤا بالاهلى منهم خالد جبر ,واستضافة اشخاص من اندية اخرى للكلام عن مشاكل ناديهم ودا مايهمش جمهور الاهلى لان القناة دى المفروض خاصة بالاهلى بس.
فى مباريات الالعاب الاخرى مش بتتذاع على القناة على الهواء او حتى مسجلة وبيتذاع احيانا لقطات منها ودا خطأ كبير لان من دور قناة الاهلى تعرف الناس بكل الالعاب فى الاهلى ,ولازم برضو يبقى فى برامج مخصصة للالعاب الاخرى يقدمها متخصصين فى اللعبة.
ماتشات الاهلى فى الفريق الاول الودية بتتذاع تانى يوم مش عارف ليه مش مباشر ونفس الكلام بالنسبة لماتشات الشباب والناشئين.
الحياد فى التعليق:بنشوف ان المعلقين حيادين اوى فى التعليق ولما الاهلى يجيب جون نفس نبرة صوت المذيع لما الاهلى يدخل فيه جون ودا يحسسنا اننا بنتفرج على قناة عادية وفى برضو فى الماتشات بنشوف ان الوقت بتاع الماتش فى الشوط التانى بيبتدى من الدقيقة الاولى وليس ال45 ودى طريقة قديمة اوى .
بالنسبة برضو للمعلقين مفيش معلقين مخصصين للقناة وحصريين زى اى قناة وتقريبا كل الماتشات بيعلق عليها معلق واحد (هشام فهمى) , ومش عارف فين مثلا ميمى الشربينى افضل معلق فى مصر وهو مش حصرى مع قناة تانية .
يوميا بنشوف رسالة لبطولة الجمهورية للسباحة مكررة مفيهاش جديد .
اتنمى اننا نشوف حاجات جديدة ومتنوعة.
يجب تلافى الاخطاء دى لان قناة الاهلى هى قناة لاكبر نادى فيجب ان تكون الافضل .
ايه رأيكم فى الموضوع دا